09 ديسمبر 2016

5 طقوس صباحية تجعل يومك اكثر انتاجية


ما هي اهمية الطقوس اليومية؟

اللي بيحصل في اول 30 دقيقة في اليوم له اكبر تأثير علي مايحدث في باقي اليوم ,  المفروض انك تتحكم و تمسك بزمام الوقت ده عشان تقضي يومك بصورة افضل , كل الناس الناجحة ليهم طقوس بيعملوها كل يوم و كل واحد ليه نظام خاص بيه و الحاجات دي بتساعدهم علي انهم يمارسوا حياتهم بشكل اكتر كفائة .

قبل ما تبدأ 


ابعد عن المشتتات اي حاجة زي التليفون و التليفزيون و النت و اي حاجة مش هتقدر تتحكم في تأثيرها عليك و ممكن تأثر عليك بالسلب اكتر مما تتخيل .



 مثلا لو يومك بدأ بانك فتحت النت و اتفرجت علي كام خبر كدة ضايقوك و بعدين لقيت علي فيسبوك واحد من اصدقائك عامل شير لصورة في مصيف او مكان مميز و شكله فرحان و تبتدي تضايق و تقول يعني انا تعبان و طلعان عيني في الشغل و ناس تانية بتفرفرش و بيتفسحوا و شوية كدة تقفل النت وتتكلم في التليفون و في نفس الوقت تروح تجيب القهوة من المطبخ و مش مركز و سرحان في اللي بيحصلك وهوب صباع رجلك الصغير و رجل كرسي ياخدوا بعض بالحضن و تتنطط من الوجع و شوية من القهوة يتدلقوا علي هدومك و علي السجاد و تتنرفز و تقضي ربع ساعة بتنضف السجاد عشان مراتك او والدتك ممكن تعلقك , و تروح الشغل متكدر و معملتش اي حاجة مفيدة و متشتغلش بكفائة و اليوم يعدي و انت متضايق .

حاول تسيطر علي اليوم من اوله و ابعد عن المشتتات هكرر تاني , ابعد عن النت متفتحش الميل اهم حاجة ابعد عن النت الصبح متفتحش الميل , حاول تبعد عن النت و الموبايل ابعد عن اي حاجة ممكن تشغل دماغك علي الصبح , كدة كدة هتروح الشغل و تفتح الميل و تشتغل و اليوم يعدي خلي الشغل يبدأ اول ما توصل الشغل مش قبلها .

يلا نبتدي 


1- دش منعش

من احسن الحاجات اللي ممكن تعملها هتخلي جسمك ينشط و تدخل في الموود بسرعة , ممكن تلعب رياضة قبل الدش حتي لو 15 دقيقة .

2-صلاة و تأمل

متنساش الجانب الروحاني عندك , قوة الارادة و الطاقة الداخلية بترتفع مع الصلاة و لازم تجددها بانتظام .

3-اكتب في مذكراتك (journaling)

المذكرات بنكتب فيها دايما اللي حصل في اليوم والافكار اللي جوانا و تعتبر وسيلة جيدة للتعبير عن اللي جوانا و ممكن تعتبرها تفريغ لطاقة فكرية , حاول كل يوم تفضي اللي في دماغك في المذكرات بتاعتك عشان دماغك تبقي فاضية بعد كدة , لو مبتكتبش مذكرات انصحك تجرب الموضوع ده لمدة اسبوعين مش هتلاقي حاجة تكتبها في الاول اكتب اللي يخطر عل بالك و بعد كدة هتلاقي دماغك اتعودت علي كدة و الافكار بتيجي اكتر و مش هتلاحق تكتب كل حاجة .  


4-  قراءة لمدة 30 دقيقة

دي اهم حاجة ممكن تعملها كل يوم و هتفرق معاك علي المدي البعيد ,لو روايات او غيرها خليها بالليل قبل ما تنام عشان بتكون مش محتاجة تركيز عالي اوي انصح بالكتب المرتبطة بتطوير الذات و الانتاجية او حاجة مرتبطة بمجال عملك  , تخيل لو بتعمل كدة كل يوم هتخلص حوالي كتاب او 2 في الشهر, يعني في السنة متوسط 15 ل 20 كتاب , حاجة زي كدة هتخليك تفرق بكتير عن غيرك اللي مش بيقرا في مجاله او بيتعلم حاجات تساعده يكون اكتر انتاجية و تنظيما . 

5-فطار جيد

ركز ان الفطار ميكونش فيه سكريات و دهون مصنعة , حاول يكون فطارك مليان بروتين و الياف ,اكل السكريات و الدهون علي الصبح كدة بيرفع معدلات السكر بقوة و يزيد من شعورك بالخمول و الكسل غير الاضرار الصحية زي الكوليسترول و السمنة و مرض السكري علي المدي البعيد , البروتين بيديك طاقة كويسة في اول اليوم و بيزود معدل الحرق و الالياف افضل للهضم يعني هتحس بنشاط و حيوية و كمان وزنك هيقل لو زيادةعن الطبيعي 

في حالة انتظامك بالطقوس الصباحية , هتحس بالفرق في خلال شهر او 2 في مستوي انتاجيتك و انخفاض توترك و علي المدي البعيد هيكون عامل مؤثر في نجاحك في مجالك و علي صحتك .