اول حاجة كل عام وانتم بخير بمناسبة شهر رمضان الكريم
في صلاة الجمعة كان الخطيب بيقول كلام عجبني اوي بخصوص شهر رمضان هقولكم الجزء الذي اعجبني ويدعو الي التفكير و التدبر و ساضيف بعض الكلام من عندي :
في صلاة الجمعة كان الخطيب بيقول كلام عجبني اوي بخصوص شهر رمضان هقولكم الجزء الذي اعجبني ويدعو الي التفكير و التدبر و ساضيف بعض الكلام من عندي :
- الناس بتصوم في رمضان الصبح بس و احيانا بيكونوا نايمين ويصحوا علي الفطار وبعد الفطار كده خلاص بقي رمضان خلص و نقضيها معصية و فرجة علي المسلسلات و الاغاني و الشتائم وكل ما لاذ وطاب لدرجة ان يوجد من يفطر علي السيجارة !! و يقضي الليل في اي حاجة ليس لها علاقة برمضان ... الصيام في رمضان في كل شيء في الصباح و المساء و ليس في وقت الصيام بس و بعد كده عادي براحتك.
- سلوكيات عجيبة في الاكل في رمضان بناكل اكل اكترمن اللي بناكله في اليوم العادي مع الاخذ في الاعتبار ان احنا بناكل اكتر من مرتين في اليوم في الايام العادية ده طبعا غير الحلويات العجيبة اللي مش بناكلها غير في رمضان بس طبعا بعد كل ده ما بتبقاش قادر تتحرك و لا تنزل تصلي ولا اي حاجة , الغرض من الصيام راح بعد كل الاكل ده و طبعا ولا حسيت بفقير ولا حاجة اللي بتصرفه في الشهر ده علي الاكل تقريبا ضعف الصرف العادي
- العزومات الكتير علي الفاضي و المليان و دي حاجة غالبا بتشغلك عن التعبد وصلاة التراويح و يقول احدهم مش العزومات مطلوبة فهي من صلة الرحم اقول نعم ولكن في حدود الاقارب وليس عزومات صديقي في العمل و مدير العمل و الرجل الذي بالكاد اعرفه من فترة قصيرة , اذا كانت العزومات مطلوبة اسال نفسك سؤال هل تعزم هذا الكم من الناس طوال فترات العام في اي وقت غير رمضان ؟ بصراحة الشيخ عنده حق .
في النهاية اقولكم رمضان ده فرصة لترك الذنوب والالتزام بالاستغفار والتقرب الي الله .. لا تضيعوا الفرصة , المسلسلات بتيجي في كل وقت في رمضان او غيره وممكن تتفرج عليها في اي وقت حتي ممكن تتفرج عليها في الوقت اللي انت عايزه من علي النت ,مش بقولك اقفل التليفزيون خالص بس لا تجعله اهم من الطاعات و العبادات , اقرا قران صل التراويح تبرع و لو حتي بمجهودك في اشياء مثل موائد الرحمن استغفر الله كثيرا و ربنا يكرمنا ان شاء الله .. و رمضان كريم