كل سنة بتعمل نفس المصيبة و متذاكرش من اول الدراسة ما تبدأ و غالبا اصلا مش بتحضر محاضرات و عايش حياتك و فجأة واحد صاحبك يكلمك و يقولك عندنا ميدترم الاسبوع الجاي ! . تبتدي تحضر اللي تقدر عليه الاسبوع ده علي امل انك تفهم حاجة او ان الامتحان يجي من المحاضرات دي, و تجيب ورق قد كدة و تذاكر منه و طبعا مش بتخلصه كله ومش عارف تفهم اللي مكتوب و لا تحفظه و لا ايه المهم و ايه اللي مش مهم و تدخل الميدترم و تلبس طبعا و تجيب 3 من 15 مثلا و تقنع نفسك انك هتعوض في الفاينال !
لو دي اول مرة تدخل كلية احب اقولك انك مش هتعوض في الفاينال عشان بنسبة كبيرة هتعمل نفس اللي بتعمله قبل الميدترم و تتزنق و تلبس في الفاينال و لو مش اول مرة يبقي انت اكيد عارف انا بتكلم عن ايه.
علي العموم دلوقتي عندك فرصة كويسة تلم المنهج و تجيب تقدير كمان
اول حاجة احضر محاضراتك و السكاشن بتاعتك
الفترة دي
بيتشرح فيها تقريبا تلتين اللي هييجي في الامتحان , خلينا ناخد فكرة بسيطة عن
المنهج بيتقسم ازاي , الدكتور بيبقي عنده اهداف المفروض توصلها في المنهج وبيبتدي
يديك مقدمات و اساليب و قوانين تساعدك توصل للاهداف دي غالبا نص المنهج الاول
بتدرسه عشان تفهم النص التاني و هو خلاص امتحنك في الميدترم في الجزء ده .
اكيد مش هيحمل جزء كبير من درجة الامتحان عليه ,في الفاينال غالبا هيبقي عايز يختبر مستواك في اهداف المنهج اللي هو حاطها عشان كدة ممكن اكتر من تلتين الامتحان يكون من نص المنهج اللي بعد الميد ترم , لو المادة بتهتم بالحفظ و مفيهاش نظريات و غيرها ممكن النسبة تقل بس برضو مش هيجيب كتير من النص اللي امتحنك فيه اصلا في الميد ترم.
ذاكر المادة اكتر من مرة
ذاكرة مادة كلها و خلصها علي الاقل اسبوع قبل الامتحان وعلي حسب الوقت ممكن تراجع مرة او 2 قبل الامتحان و ده هيرفع فرص احتفاظك بالمعلومات.
هات امتحانات فاينال السنين اللي فاتت
بنسبة كبيرة في اسئلة مشتركة في الامتحانات دي ,بعض الدكاترة بيبقي عنده 50 سؤال مثلا و كل سنة بيختار 10 في امتحان و خلاص ,و في دكاترة بتنزل الامتحان من 5 سنين مثلا زي ما هو ! , الامتحانات القديمة هتديك فكرة كويسة عن اللي مطلوب منك تذاكره و تركز عليه.اتدرب علي حل امتحانات بنفسك في وقت زي وقت الامتحان الحقيقي عشان مهما ذاكرت لو ما ادربتش علي حل الاسئلة وحسيت بالمشاكل و حسنت من نفسك و عرفت تحل مش هتحقق نتيجة كويسة زي ما انت متوقع .
نصايح متفرقة
- لو انت في الوقت ضايع و قدامك حاجة واحدة تعملها يبقي حل امتحانات كتير و السؤال
- متفتحش جروب الدفعة كل شوية و متضيعش وقت عليه عشان متحسش بالاحباط ان الناس بتتكلم عن حاجات انت لسة مذاكرتهاش او تفاصيل صعب انها تيجي و تتلخبط تذاكرها و تنسي المهم , علي العموم مرة في اليوم 10 دقايق كفاية و بلاش تفتح الجروب خالص ليلة الامتحان.
- انصحك تقلل من اكلك في فترة الامتحانات عشان متحسش بخمول و متذاكرش كتير , علي الاقل قسم وجباتك علي 5 وجبات مش 3 عشان تفضل في حالة نشاط كافي للمذاكرة
- رياضة 10 ل 15 دقيقة هتفرق معاك جدا
ربنا يوفق الجميع