15 نوفمبر 2016

كيف تدير امورك المالية


معظمنا اللي بيشتغل او حتي اللي بياخد مصروف و لسة موصلش سن العمل غير قادرعلي السيطرة علي اموره المالية ، يعني دائما عند اقتراب نهاية الشهر الفلوس بتخلص و بنستلف او بنعيش اخر اسبوع في الشهر زي الشحاتين و اول لما نقبض بنصرف اغلب الفلوس في اول اسبوع في الشهر و نفضل في الدايرة طول الوقت ، الشهر بيسلم التاني و الوضع مش بيتغير حتي لو مرتبك زاد عشان ببساطة مصاريفك بتزيد عشان تناسب مستواك الاجتماعي اللي متخيل انك وصلتله ! بس انت برضو بتعيش اخر اسبوع في الشهر زي الشحاتين او بتستلف .




حالتك اخر الشهر مش محتاجة صورة للتوضيح عشان كلنا عارفين اللي فيها

اول شيئ تخلص من الديون او علي الاقل سيطر عليها 
لو عليك ديون كتير , دي مشكلة كبيرة لازم تركزجزء كبير من مجهودك انك تتخلص منها , اول حاجة احسب حجم الديون اللي عليك , و بعدين رتب اولوياتك في تسديدهم لو الديون دي لناس انت مستلف منهم ممكن تتكلم معاهم و تتفق انك هتدفع الديون علي دفعات منتظمة لغاية لما تخلص الديون اللي عليك , لو الديون اللي عليك لبنوك يبقي لازم تديها اولوية عشان متدخلش في دايرة فوائد و رسوم تاخير و غيرها.
طلع علي الاقل 10 في المائة من دخلك الشهري لسداد الديون عشان تخلص منها بدري و تعرف تحوش فلوس تعمل بيها حاجة


ارسم خطة لمصروفاتك و التزم بتحسينها مع الوقت 
لازم يكون عندك خطة او تصور واضح لمصروفاتك الشهرية , من اقوي الطرق انك تسجل كل مصروفاتك كل يوم و اخر الشهر تراجع نفسك و تشوف مصاريفك بتروح فين و تحاول تحسن من ادائك الشهر اللي بعده , لو عندك مهارة بسيطة في الاكسيل ممكن تسجل البيانات عليه و هيسهل عليك الحسابات جدا و متابعة تطور ادائك

ابدأ في الادخار 
مهما كان دخلك لازم تحوش حاجة منه يفضل 10 في المائة او اكتر و افضل طريقة للتحويش انك تدفع لنفسك الاول , اول لما المرتب ينزل علي طول تاخد 10 في المية من مرتب و تشيله علي جنب و بعدين تشوف ال 90 الباقيين هتعمل بيهم ايه و تظبط نفسك عليهم طبعا في ناس صعب عليها الكلام ده احب اقولك متصعبش الموضوع علي نفسك جرب وبعدين ظبط احتياجاتك ممكن تبدأ بحاجة بسيطة مثلا 1او 2 في الماية من مرتبك وبعدين زود النسبة في حدود 10 او اكتر لو مش هينفع تبدأ ب1 او 2 في الماية اقفل الصفحة دي و ارجع لحياتك عادي و عيش زي ما انت كدة كل شهر يسلم التاني و خلاص.

الفلوس اللي هتشيلها للادخار لازم تطلع حتي لو انت مديون , لازم تبدأ تحويش في اقرب وقت وتلتزم بالموضوع ده لانه يعتبر اهم مفتاح في طريقك للاستقلال المالي

مثال بسيط يوضح تنظم دخلك الشهري ازاي و ده اللي هتعمله في في كل 1000 هتقبضهم


استثمر 
طبعا اول لما اقولك استثمر بيطلع في دماغك بورصة و رجال اعمال لابسين بدل و حاجات كدة ,بطل فرجة علي افلام عربي و ركز معايا.

الاستثمار هو انك تشغل المبلغ اللي معاك و تاخد عائد عليه بس كدة , ممكن الفلوس اللي معاك تشغلها في البورصة لو بتحب المخاطرة ممكن تحطها في سندات او شهادات استثمار و كله بيطلع بعائد و مكسب ليك و كل لما تزود المبلغ اللي بتستثمره كل ما ارباحك بتزيد و كل لما تحسن اختياراتك في الاستثمار كل لما فرصتك بتزيد في نسب ارباح اعلي.

مثال سيءعلي اختياراتك في الاستثمار
معاك مبلغ كويس تروح لشركة ادارة اوراق مالية و تشتري بيهم اسهم لكام شركة مشهورة سمعت اساميهم في النشرة الاقتصادية بالليل.
طبعا انت معندكش اي خبرة في اي حاجة و تقريبا بترمي فلوسك في حاجة مجهولة و مش عارف نتايجها.

مثال جيد
تعرف واحد شغال و عنده خبرة في مجال معين مثلا التجارة , في بعض الاوقات بيبقي السيولة مش متوفرة معاهم ممكن تكلمه و تعرض عليه انك توفر له مبلغ معين و يرد لك المبلغ مع الارباح بعد فترة .
كدة في فرصة ان فلوسك ترجع كاملة علي الاقل او تيجي معاها ارباح كويسة .

الموضوع محتاج التزام شوية بس النتايج تستاهل و الله