سؤال يدورفي عقل البعض ؟
الناس دي بتضيع وقت قد ايه عشان تعمل الفيديوهات اللي بتنزل مرة او 2 كل اسبوع او احيانا اكثر من ذلك للقنوات النشيطة و التي ممكن تنزل اكثر من مرة في اليوم !
الحقيقة ان الموضوع مش هواية لاغلبهم و بيكسبوا فلوس كويسة , كويسة لدرجة انك ممكن تبطل الشغل الاساسي بتاعك و تتفرغ لقناتك علي اليوتيوب
بيكسبوا كام بقي ؟
علي حسب المشاهدات للفيديوهات و عدد المشتركين بس خلينا نفرض انك عندك قناة فيها مليون مشترك و عدد مشاهدات المتوسطة حوالي 500,000 منهم 20 في المائة من مشتركين القناة
في المتوسط هتكسب علي كل 1000 مشاهدة 2 دولار من برنامج ادسنس للاعلانات الخاص بجوجل التي تظهر بجانب الفيديو او في داخل الفيديو
بحسبة بسيطة للقناة ذات مليون مشترك ومتوسط نصف مليون مشاهدة للفيديوالواحد كل اسبوع . ربحك الشهري حوالي 4 الاف دولار (اللهم لا حسد يعني ! )
في مصادر للدخل لبعض القنوات غير اعلانات جوجل , مثلا في قنوات يتعمل مراجعة لمنتجات زي موبايلات او اكسسوارات و بياخدو عمولة عن بيع المنتجات اللي الناس بتشتريها عن طريقهم لما بيدخلوا لموقع امازون من لينك من اللينكات اللي في وصف الفيديو
ممكن لو القناة بتاعتك مشهورة قوي يبقي في راعي رسمي للقناة و يدفع مبلغ كبير مقابل ان اسم الشركة او العلامة التجارية يتقال اسمها او نبذة 5 ثواني في اول الفيديو
في نظام العمولة علي منتجات للبيع عن طريق امازون amazon affilliate كل لما مشاهد يدوس علي لينك او رابط علي القناة لمنتج معين علي قناة يوتيوب بيبقي عنده فرصة ياخد عمولة عند البيع و طبعا لو منتجات غالية ال1 في الماية اغلي كتير من الاعلانات علي اليوتيوب
في امثلة لقنوات بتكسب ملايين في السنة و ممكن اكتر ! (بفكر اقطع شراييني دلوقتي )
الموضوع مش سهل في الاول بس مع الوقت الامور بتتحسن
احد المدونين المشهورين علي اليوتيوب MKBHD مكانش بيكسب اي فلوس لغاية لما عدي ال100 فيديو علي القناة بتاعته ! و اخد وقت طويل جدا لغاية لما وصل ل100 الف مشترك و بعد كدة الامور بقت سهلة وصل دلوقتي لأكتر من 3 مليون مشترك ! ( تعديل 11 مليون حاليا !!), مش كل الناس عندها الصبر و الالتزام لعمل مئات الفيديوهات و تعديلها و رفعها بس هيبقي مجزي بعد فترة من الوقت .
ارجو ان يكون هذا الهام لبعضنا لبدء قناة مفيدة و العمل عليها , و ربما تستبدل عملك الاساسي في المستقبل , العالم بيتغير و الشركة اللي شغال فيها مش هتبقي مصدر دخلك الوحيد زي زمان
البدئ في عمل قناة مش صعب و صنع المحتوي بقي اسهل بكتر من الاول انصحك تبتدي لو عندك حاجة تقدر تشارك الناس بيها سواء تعليم مهارة او مشاركة افكار و خدع منزليه او حتي ترفيهية
المعدات و ادوات التصوير غير ضرورية كل اللي هتحتاجه موبايل بكاميرا و برنامج تعديل فيديو علي الموبايل و تقطع و ترتب افكارك و هتنبهر بالنتايج