28 يونيو 2016

كيف تصنع موهبتك ؟!



يا تري الواحد بيتولد موهوب ؟
الموهبة مش زي ما انت متخيل 
النجاح 99 في المائة جهد , 1 في المائة الهام 

طب طالما الموضوع بالمجهود ليه مش ناس كتير متميزة في شغلها او هواياتها ؟

الموضوع ببساطة ان المجهود ده مش مجهود شهر او اتنين ممكن يكون مجهود سنيين او اكتر من عقد كامل , كتاب  outliers  قال رقم واضح ممكن نبقي متميزين او موهوبين في نظر الناس لو وصلناله الرقم ده 10,000 ساعة ايوة عشرة الاف ساعة يعني تقريبا 3 ساعات 6 ايام في الاسبوع لمدة 10 سنوات تمرين او ممارسة للحاجة اللي نفسك تبقي متميز فيها
طبعا اغلب الناس مش بتصبر علي حاجة لمدة 10 ساعات !

فاكرين المشهد اللي كان في فيلم "لا تراجع ولا استسلام القابضة الدامية " لما كان الشخصية "حزلئوم " لسه متعلمش السواقة و عايز يخمس بالعربية و مستعجل و فاكر الموضوع سهل .



طبعا هو شاف الراجل بيخمس بالعربية و الموضوع ماشي حلاوة معاه حس ان الموضوع سهل و كدة بس "عمرو مكجايفر " السائق موصلش للمستوي ده في 10 ايام ولا حاجة ده قعد سنين يتدرب و يدخل مسابقات دريفتينج و كسب شوية و خسر اكتر و ساق انواع عربيات كتير لغاية لما بقي كدة

احنا للاسف زي حزلئوم كدة بنشوف الحاجة و نحس ان الموضوع سهل ونحاول نجرب نتصدم ان الموضوع كبير و حاجة من الاتنين اما منبتديش اصلا او نبتدي و بعدين نزهق و مش هضحك عليك و اقولك لازم تكون بتحب الموضوع و عندك  passion  ليها و ده غالبا هيدخل في دوامة انك تدور علي الشغف بتاعك و هتضيع وقت كتير و غالبا مش هتوصله او مش هتبقي متاكد ان وصلتله

حقيقة البحث عن الشغف

في الاول هو غالبا مش هتلاقي الشغف بتاعك  لو مش بتدور عليه
تاني حاجة حتي لو لقيته قلبك مش هيدق و حب من اول نظرة و الجو ده
لازم تجرب حاجات كتير لغاية لما تلاقي نفسك فعلا عاجبك اللي بتعمله و حاسس ان الوقت بيعدي عليك من غير ما تحس و انت بتعمله , لماتصحي بدري مخصوص عشان عندك حاجة عايز تعمله او تجربها.

الكلام اللي فوق ده لا ينطبق علي games  و الفرجة علي التليفزيون بدون اي هدف !
حتي لو في games ممكن تجرب تبرمج لعبة او حتي تكتب قصتها و تشارك مع واحد في انه يبرمج و حتي لو التليفزيون ممكن تتعلم اسالب الاخراج و تجرب نفسك في معهد سينما و لا حاجة او تمثل

طب اعمل ايه؟
ركز علي حاجة واحدة بس متلخبطش نفسك باكتر من تجربة في نفس الوقت
خلي في وقت خاص لممارسة النشاط اللي انت عايزه و اثبت عليه لو مفيش وقت يبقي الموضوع مش من اولوياتك و انسي الكلام اللي فوق ده كله و اقفل الصفحة و انزل اقعد علي القهوة مع اصحابك و احسد الناس الموهوبين وتحسر علي حظك النحس اللي خلاك كدة
 الموضوع مش سهل , الناس دي بتاخد وقت و مجهود كبير عشان الموضوع يظهر انه سهل و بسيط

التميزعايز مجهود ووقت و التزام, الناس المتميزة دي مش احسن منك
لو في حاجة في دماغك و عايز تبقي متميز فيها ابتدي اتعلمها و قابل الناس المتميزة فيها و اسالهم عن الصعوبات اللي واجهتهم و بدأوا ازاي و اتصاحب علي الناس اللي بتتعلم الحاجة دي .

خلينا ناخد مثال كدة نفترض انك عايز تبقي مؤلف و تكتب رواية تنزل السوق و تكسر الدنيا

ابتدي اقرا في روايات مشهورة و اتعلم منها و ناقش مع اصحابك اللي قروها ايه اللي عجبك
ابتدي اكتب في الكتاب .. ايوة متستناش كتير فكر في فكرة بسيطة و ابتدي نفترض الكتاب حوالي 100 صفحة اكتب صفحتين كل يوم يبقي في خلال 50 يوم هتكون خلصت ..

 النتيجة: دي اسوأ رواية انت عملتها في الدنيا و الناس هتقولك وحشة و كدة مش مشكلة المهم انك كونت عادة انك تكتب كل يوم صفحتين بغض النظر عن الجودة , اهم حاجة تحافظ علي العادة دي و الجودة هتتحسن مع قرايتك لروايات مميزة و ازدياد خبرتك في الكتابة
اشترك في ورش عمل لتاليف الكتب
انضم لنادي كتاب
كل ما الوقت بيعدي هتلاقي نفسك بتتطور و بتتحسن و في خلال سنة هيبان فرق كبير , بص كدة علي الرواية اللي عملتها اول مرة و هتلاحظ ان في فرق مهول بين اول مرة و بعد سنة

طيب هل ده معناه انك بقيت كاتب متميز و موهوب ؟
لأ, بس انت دلوقتي في حالة احسن بكتير من لو مكنتش بدات و افتكرت ان الموهبة بتيجي لوحدها و انك بتتولد كاتب موهوب , كمل المشوار و هتلاقي كتابك في المكتبات في خلال 3 سنين مثلا

عافر لغاية لما توصل للي انت عايزة و انسي موضوع الموهبة و افتكر المقولة دي دايما

"hard work beats talent if talent doesn't work hard "

العمل الجاد يهزم الموهبة اذا لم تعمل الموهبة بجد