نصائح في مقابلة العمل interview

شوية نقط بسيطة ممكن تساعد كل اللي بيدور علي شغل الفترة دي

قبل اي حاجة لازم تقرا عن الشركة و تاريخها و انجازاتها و مميزاتها و عيوبها و الكلام ده سهل افتح موقع الشركة و 10 دقايق سيرش علي جوجل و لينكد ان هتعرف كل حاجة 

لو متعرفش ايه لينكد ان (linked in )  ده اعمل سيرش عنه و اعمل حساب عليه بسرعة و خللي الموضوع سر ما بينا

اوعي تقول للrecruiter  انك متعرفش لينكد ان او لسة عامل اكونت قريب

راجع السيرة الذاتية او السي في اللي بعته للشركة لان المقابلة كلها مرتبطة باللي مكتوب فيه و بالاجابات اللي هتقولها و ممكن يبني عليها اسئلة جديدة

  الملابس المناسبة dress code

يفضل تلبس بدلة كاملة فورمال يعني , ساعات لما بيكلموك في التليفون او يبعتولك ايميل بيقولولك ال dress code 

لازم تيجي في معادك , التاخير يعتبر اهمال و اهانة للrecruiter  ممكن ميرضاش يعمل مقبلة معاك اصلا و هيدخل اللي بعدك , لو قفلت خالص اتصل عليه قبل ما يجي المعاد و قولو احتمال اتاخر ممكن نحدد معاد تاني في نفس اليوم او يوم تاني ؟ غالبا مش هيرفض الا لو هو يوم واحد للمقابلات و كل المواعيد محجوزة

متحطش عطر قوي , حط حاجة هادية او متحطش حاجة خالص استحم و مزيل عرق و خلاص 

للبنات متحطيش فل ميك اب .. بس كدة 

لما تقابل الrecruiter متعملش اي فعل من نفسك انت متعرفش شخصيته لسة , لو مد ايده سلم عاليه لو ممدهاش خلاص يبقي صباح الخير او سلام عليكم , متقعدش من نفسك و الاهم متفعدش و هو واقف لسه واقف 

اخطاء شائعة 

اوعي تتوتر دي مقابلة عمل اعتبرها دردشة و متحطش في دماغك ان مستقبلك كله معتمد علي المقابلة دي , غالبا هيضغط عليك في الاسئلة عشان يشوف رد فعلك خليك هادي برضه 

التكشير او الابتسام الزائد .. خليك هادي و ريلاكسيد كدة 

مترغيش جامد جاوب علي قد السؤال 

اقفل التليفون خالص و لو نسيت و رن  غصب عنك اقفله و اعتذر حتي لو عمل نفسه مش فارقة معاه و قالك رد علي التليفون 

متربعش ايدك هو مش بيحاكمك .. خلي ايدك مرتاحة كدة علي رجلك او علي الترابيزة 

مترحش جعان 

مترحش بعد ما تاكل علي طول 

ادخل الحمام قبل المقابلة

متسالش عن الراتب في المقابلة 

اسئلة متكررة في المقابلات 

انت جي تشتغل عندنا ليه , اشمعنا شركتنا اللي قدمت فيها , ..

احكيلي عن تجربتك في الشركة اللي قبل كدة 

مميزات في شخصيتك

عيوب في شخصيتك

هواياتك 

هيسالك عن مواقف في العمل و هتتصرف فيها ازاي

شايف نفسك فين بعد 10 سنين 

جهز اجاباتك من قبل ما تروح المقابلة للنوعية دي من الا سئلة

يفضل تعمل زي بروفة مع واحد صاحبك يكون فاهم و تاخدو الموضوع جد اوي و تخليه يقولك رايه بصراحة عشان تظبط نفسك قبل المقابلة

طيب نفترض ان المقابلة خلصت علي خير و الحمد لله هيسالك عندك اسئلة معينة .. يفضل يكون عندك سؤال او 2 بخصوص الشركة و ايه لو اتقبلت ايه هي طريقة الترقية عندهم و كدة .

حاجة اخيرة متسالوش عن الراتب ارجوك و لو سالك متوقع راتب كام قول له مش هنختلف ان شاء الله و استني لما هو يعملك عرض